Spánn: Varamaðurinn Prats tryggði Mallorca sigurinn

Real Mallorca bar sigur úr býtum gegn Valencia, 2-1, í La Liga í kvöld.

Færin voru fá fyrstu mínúturnar. Skallar framhjá á báðum endum og var það ekki fyrr en á 31. mínútu sem það dró til tíðinda er Valencia fékk vítaspyrnu eftir að varnarmaður Mallorca handlék boltann í teignum.

Luis Rioja fór á punktinn og skaut þéttingsföstu skoti efst upp í hægra hornið.

Cyle Larin var helsta vopn Mallorca fram á við. Hann var í kringum allar sóknir heimamanna og var það auðvitað hann sem skoraði jöfnunarmarkið undir lok fyrri hálfleiks með góðu skoti eftir fyrirgjöf frá hægri.

Á 79. mínútu kom Abdon Prats inn á hjá Mallorca og þremur mínútum síðar skoraði hann sigurmarkið. Aftur kom fyrirgjöfin frá hægri og náði Prats að lauma sér fyrir aftan vörnina og stanga boltann í netið.

Annar sigur Mallorca í röð sem kemur liðinu í 5. sæti deildarinnar með 24 stig en Valencia er í miklu basli í 18. sæti deildarinnar með aðeins 10 stig.