,,Vonandi getum við lært af fyrsta leiknum og staðið uppi sem sigurvegarar eftir 90 mínútur," sagði Andreas Alm þjálfari AIK við Fótbolta.net í gær en liðið mætir FH í Kaplakrika klukkan 19:15 í kvöld í síðari leik liðanna í annarri umferð Evrópudeildarinnar.
Fyrri leiknum lauk með 1-1 jafntefli og því er ljóst að AIK þarf að ná að minnsta kosti einu marki í kvöld til að fara áfram.
,,Þeir spiluðu vel og voru skipulagðir. Sem betur fer fáum við aftur 90 mínútur til að spila gegn þeim. Við erum sterkir og við erum nokkuð vissir um að við munum fara áfram á endanum."
Bjarki Gunnlaugsson fór á kostum í fyrri leiknum og Gunnleifur Gunnleifsson var einnig öflugur í markinu. Alm nefndi þá sérstaklega til sögunnar í FH liðinu.
,,Þeir hafa reyndan markvörð og númer 13 á miðjunni sem er líka reyndur. Síðan hafa þeir klára leikmenn frammi og fljótan vinstri kantmann. Vinstri bakvörðurinn er líka með góðan vinstri fót. Þeir hafa góða blöndu fyrir Evrópukeppnina en vonandi endar þátttaka þeirra þar á morgun (í dag)."
Hér að ofan má sjá viðtalið í heild sinni en þar tjáir Alm sig meðal annars um ummæli leikmanna AIK eftir fyrri leikinn.
