Kolbeinn ræddi við Fótbolta.net á hlaupabrautinni og kvaðst þurfa að hvíla í nokkra daga. Hann verður þó til í slaginn fyrir leikinn gegn Tyrkjum.
,,Ég tognaði á ökkla í seinasta leik og þess vegna hef ég þurft að sleppa þessari æfingu. Ég tel þetta ekki vera alvarlegt, læknarnir hafa skoðað mig og sagt að ég þurfi að hvíla næstu tvo daga," sagði Kolbeinn við Fótbolta.net.
Kolbeinn var sterklega orðaður við Queens Park Rangers í sumar og var búist við því að hann myndi yfirgefa Hollandsmeistara Ajax, en hann ákvað þó að gera nýjan samning við félagið og taka allavega eitt tímabil til viðbótar í Amsterdam.
,,Ég ákvað að vera áfram hjá Ajax, mér fannst ég ekki þurfa að flýta mér og held ég fái góðan spiltíma núna. Svo sjáum við bara til hvað gerist á næsta ári, ég ætla að reyna að eiga gott tímabil hjá Ajax," sagði Kolbeinn, sem viðurkennir að hann hafi hugsað sér til hreyfings.
,,Ég bjóst sjálfur persónulega við því að fara og var alveg tilbúinn í það að fara, en seinustu vikur breyttu því. Ég fékk meira að spila og aðeins betri tilfinningu fyrir því að vera áfram. Það var ástæðan fyrir því að ég skrifaði undir eitt ár í viðbót."
Kolbeinn neitar því ekki að það hefði líklega verið gaman að spila undir stjórn hins litríka Harry Redknapp:
,,Harry Redknapp er skemmtilegur karakter og örugglega mjög góður þjálfari, það hefði örugglega verið gaman. Hann var áhugasamur um að fá mig, ég viðurkenni það alveg, en ég ákvað að vera áfram," sagði Kolbeinn.
Athugasemdir