Franz Beckenbauer, fyrrverandi leikmaður og knattspyrnustjóri Bayern, var að lýsa leiknum á þýskri sjónvarpsstöð Sky og var ekki ánægður með Dante.

Þegar tók að líða á leikinn byrjaði Beckenbauer að kalla Dante ,,brasilískan Íslending," og sagði hann spila ,,eins og Íslendingur í stígvélum," þegar hann missti boltann til Quaresma.

Dante verður ekki ánægður þegar hann fær að heyra að goðsagnakenndur varnarmaður Bayern, sem skoraði 60 mörk í 427 deildarleikjum fyrir félagið á sínum tíma, hafi líkt honum við Íslending í stígvélum.

Eftir leik hélt Beckenbauer áfram að tala um Dante og Ísland, hlustendum til mikillar furðu. ,,Ef hann væri Íslendingur, eða einhversstaðar frá norðurpólnum og ennþá með skíðaskóna sína á sér, þá væri þessi varnarvinna í lagi."

Við hjá fótbolta.net viljum góðfúslega benda Beckenbauer á að íslensk knattspyrna er í mikilli sókn og margir góðir miðverðir að koma upp. Svo er líka miklu kaldara á norðurpólnum.