Sara Björk Gunnarsdóttir.
Íslenska kvennalandsliðið tekur á móti því serbneska í lokaleik sínum í undankeppni HM og verður leikið á Laugardalsvelli í dag miðvikudag klukkan 17. Þó svo að Ísland eigi ekki möguleika á því að komast í úrslitakeppnina í Kanada þá skiptir máli að ljúka keppninni á jákvæðum nótum og setja þar með tóninn fyrir undankeppni EM.
Fótbolti.net kíkti á æfingu á Laugardalsvellinum og ræddi við Söru Björk Gunnarsdóttur.
„Serbía er með fínt lið og betra en ísraelska liðið. Við unnum þær 2-1 úti en þær eru með tæknilega góða leikmenn. Þær hafa bætt sig mikið á unfanförnum árum. Við reynum að spila eins fast og við getum og þær eiga það til að henda sér í jörðina og væla smá," segir Sara.
„Við ætlum að klára þessa keppni með stæl og svo er þetta góður undirbúningur fyrir næstu keppni. Við reynum að taka það með úr leiknum gegn Ísrael sem við gerðum vel."
Markvörðurinn, Þóra Helgadóttir, hefur gefið út að þetta verði hennar síðasti landsleikur, sá 108. í röðinni, og er hér gott tækifæri fyrir áhorfendur að kveðja hana eftir frábæran feril.
„Við viljum kveðja Þóru með stæl. Það er leiðinlegt að hún sé að fara að leggja skóna á hilluna, hún hefur verið með okkur í mörg ár. Hún er einn besti markvörður í heimi."
Viðtalið má sjá í heild í sjónvarpinu hér að ofan.
Athugasemdir
