Fanndís er tilbúin í að takast á við Þjóðverja
„Þetta eru mjög krefjandi og spennandi verkefni,“ sagði landsliðskonan Fanndís Friðriksdóttir fyrir æfingu íslenska liðsins í gær. Framundan eru tveir erfiðir útileikir. Fyrst gegn Þýskalandi á föstudag og síðan gegn Tékkum á þriðjudag. Fanndís segir alla athygli beinast að fyrri leiknum á þessum tímapunkti.
„Við erum bara að fókusa á föstudaginn og erum að fara yfir Þjóðverjana. Maður er ekki einu sinni byrjaður að hugsa út í hinn leikinn.“
„Við vitum helling um þær (Þýskaland). Við höfum spilað oft við þær og ekki náð í mörg úrslit á móti Þýskalandi. Við erum búnar að vera að skoða klippur úr þeirra leikjum og sjá hvernig þær spila. Skoða þeirra veikleika og svoleiðis,“ sagði Fanndís sem mætir til leiks í góðu leikformi enda franska deildin í fullum gangi.
Fanndís vakti mikla athygli fyrir góða frammistöðu á Evrópumótinu í sumar og þótti standa sig einna best af íslensku leikmönnunum. Telur hún að andstæðingarnir muni horfa til þess og gera sérstakar ráðstafanir til að stöðva hana í komandi leikjum?
„Ekki hugmynd. Nei, ég held ekki. Ég held að þær séu bara að fókusera á sjálfar sig,“ sagði Fanndís sem er staðráðin í gera sitt besta á föstudaginn.
„Auðvitað verður maður að nýta sína styrkleika og vonandi fæ ég tækifæri til þess að refsa á einhvern hátt“
Sjáðu viðtalið í heild sinni í sjónvarpinu hér að ofan.
Athugasemdir
