Víkingur Reykjavík sýndi tvær hliðar á sér í dag gegn Íslandsmeisturum FH í Lengjubikarnum. Tveimur mörkum undir í hálfleik spýttu Víkingar í lófana í seinni hálfleik en það dugði þó ekki til að fá stig, 2-1 sigur FH staðreynd.
Lestu um leikinn: Víkingur R. 1 - 2 FH
„Ég vona að spilamennskan í fyrri hálfleik muni ekki endurtaka sig. Við fengum tvö klaufaleg mörk á okkur og það hefur auðvitað áhrif á sjálfstraustið en menn mega ekki gleyma því sem þeir gerðu í síðasta leik og hafa gert á æfingum," sagði Milos Milojevic, þjálfari Víkinga, eftir leikinn.
Hann segist ekki hafa látið menn heyra það í hálfleiknum en var sáttur með svarið frá leikmönnum í seinni hálfleik.
„Ég var ekki ljúfur en heldur ekki brjálaður," sagði Milos.
Meðan flest lið Íslands fara æfingaferð til Spánar munu Víkingar fara til Serbíu, heimalands Milosar.
„Ég þekki þetta svæði en þetta var ósk frá strákunum. Þeim fannst þetta tækifæri til að fara með mér til Serbíu. Þeir vildu prófa eitthvað nýtt. Svo fengum við mjög hagstætt verð. Við verðum meðal annars á æfingasvæði sem knattspyrnusamband Serbíu á og var byggt nýlega. Þetta lítur mjög vel út," sagði Milos sem hefur lofað leikmönnum að sýna þeim næturlífið í Serbíu eitt kvöld eins og fram kemur í viðtalinu hér að ofan.
Athugasemdir