„Ég er virkilega svekktur að hafa ekki tekið öll þrjú stigin hérna í dag," sagði Jóhannes Karl Guðjónsson þjálfari ÍA eftir 2-2 jafntefli við Njarðvík á Akranesvelli í kvöld.
Lestu um leikinn: ÍA 2 - 2 Njarðvík
„Þetta var erfiður leikur, við fáum mark á okkur snemma í leiknum en sýnum samt karakter og komumst í 2-1. Við vorum að komast í fína stöðu til að komast jafnvel í 3-1 en því miður ráðum við ekki við þá í síðasta horninu og Njarðvík jafnar leikinn. Eitt stig er ekki eitthvað sem við erum sáttir við," hélt hann áfram.
ÍA er spáð sigri í deildinni í sumar og liðið er nú með 10 stig eftir fyrstu fjórar umferðirnar.
„Hver einasti leikur er erfiður, og mikið af hörkuliðum í þessari deild. Liðin eru að spila mismunandi tegundir af fótbolta og aðstæður hafa ekki verið frábærar. Sumarið má alveg fara að koma," sagði hann.
„Við ætlum okkur stóra hluti en þetta er bara einn leikur í einu. Fjórir leikir tíu stig er fínt en auðvitað viljum við meira. Við eigum leik í bikarnum næst og ætlum okkur áfram þar," sagði hann en liðið mætir Grindavík í Mjólkurbikarnum á miðvikudaginn.
Nánar er rætt við Jóa Kalla í sjónvarpinu hér að ofan.
Athugasemdir
