Ítalía: Atalanta og Juventus skildu jöfn í Evrópuslag

Það var markalaust þegar Atalanta og Juventus áttust við í áhugaverðum stórleik í efstu deild ítalska boltans.

Fyrri hálfleikurinn var tíðindalítill þar sem jafnræði ríkti með liðunum á vellinum, en heimamenn í Atalanta tóku stjórn í síðari hálfleik.

Atalanta átti þó í miklum erfiðleikum með að brjóta vörn gestanna á bak aftur en komst nálægt því að skora í tvígang, en inn rataði boltinn ekki.

Niðurstaðan 0-0 jafntefli í Meistaradeildarbaráttunni, þar sem talið er að Atalanta og Juve séu meðal félaga sem munu berjast um fjórða sæti ítölsku deildarinnar á leiktíðinni. Talið er að Inter, AC Milan og Napoli geti barist um titilinn.

Juve er með 14 stig eftir 7 fyrstu umferðir tímabilsins, einu stigi meira heldur en Atalanta.