Arnar: Hver hefði trúað því eftir Kósovó leikina?

„Sem betur fer eru ekki þrír mánuðir á milli glugga, þetta eru einungis þrjár vikur. Ég held að liðið taki miklum framförum í þessum þremur gluggum. Menn eru fljótir að rifja upp fundina, æfingar og leikplanið.

En fyrst og fremst hlakkar ég til því við erum í bullandi séns. Okkur tókst að ná okkar markmiðum í síðasta glugga og nú erum við komnir með ný markmið í þessum glugga. Það er góð samstaða milli leikmanna, komum saman hingað til að vinna að þessu sameiginlega markmiði sem á endanum snýst um að koma okkur á HM.“ 

Arnar gerir eina breytingu frá upprunalegum landsliðshóp síðasta glugga. Aron Einar og Andri Fannar koma inn í hópinn, en Aron var upprunalega í síðasta landsliðshóp en dróg sig út úr honum vegna meiðsla.

„Það er stundum, ekki alltaf, að vera ekki að hrófla við liði sem gengur vel. Það er nógu erfitt að standa í landsliðsumhverfi, fáar æfingar og allt svoleiðis. Þú vilt hafa svipaðan hóp, að því gefnu ef leikmenn standa sig vel. Okkur fannst engin ástæða til að hrófla við of miklu og breytingarnar voru í raun og veru mjög auðskiljanlegar.“ 

Segir landsliðsumhverfið erfitt

„Svo kom ég inn á mikilmennskubrjálæði þjóðarinnar á fundinum áðan, sem ég fíla mjög vel. Það er gerð krafa um sigur og landsliðsumhverfið er mjög erfitt. Til dæmis spiluðum við allt í lagi á útivelli gegn Kósóvó en allir brjálaðir að við töpuðum. Svo kemur í ljós að þeir vinna Svía 2-0 á sama heimavelli. Þetta er mjög snúið umhverfi.“ 

„Nú erum við komnir með skriðþunga og mómentum, það er gríðarlegt vopn fyrir íþróttamenn að hafa ásamt sjálfstrausti. Við þurfum að virða skriðþungann og mæta til leiks og þá fara allir glaðir heim og við getum sett upp alls kyns sviðsmyndir eftir Frakkaleikinn. Staðreyndin er sú að ef við vinnum Úkraínu erum við að fara í toppslag í riðlinum gegn Frökkum, hver hefði trúað því eftir Kósovó leikina?“ 

Viðtalið við Arnar má sjá í heild sinni í spilaranum hér fyrir ofan.