Dómari sem Mourinho valdi mann leiksins dæmir í Víkinni

Það eru Evrópuleikir framundan hjá íslensku liðunum á fimmtudaginn, Breiðablik er í forkeppni Evrópudeildarinnar og Víkingur í forkeppni Sambandsdeildarinnar.

Víkingur mun mæta danska úrvalsdeildarliðinu Bröndby á Víkingsvelli en Atilla Karaoglan frá Tyrklandi mun dæma leikinn. Allt dómarateymið kemur frá Tyrklandi, þar á meðal VAR dómararnir.

Jose Mourinho, stjóri Fenerbahce, er ekki mikill aðdáandi Karaoglan og talaði í kaldhæðni um að hann hafi verið maður leiksins þegar hann var VAR dómari á leik gegn Trabzonspor í tyrknesku deildinni á síðasta tímabili.

„Í dag var Atilla Karaoglan (VAR dómarinn) maður leiksins. Við sáum hann ekki, en hann var dómari leiksins. Við viljum ekki fá hann aftur. Við viljum hann ekki því það er vond lykt af þessu. Við viljum ekki hafa hann á vellinum og sérstaklega ekki í VAR-herberginu," sagði Mourinho eftir leikinn og fékk refsingu frá tyrkneska sambandinu.