Prince Rajcomar í KR (Staðfest)

Prince hefur leikið með Breiðablik undanfarin tvö tímabil en hann átti erfitt uppráttar hjá Kópavogsliðinu síðastliðið sumar og mátti hann þola mikla bekkjarsetu.

Hann spilaði 18 leiki og skoraði í þeim sjö mörk í Landsbankadeildinni síðastliðið sumar.

Prince hóf atvinnumannaferil sinn með Fortuna Sittard í næstefstu deild í Hollandi og skoraði átta mörk í 50 leikjum fyrir félagið áður en hann gekk til liðs við FC Utrecht í efstu deild í Hollandi þar sem hann lék 20 leiki.

Hann var síðan lánaður til Den Bosch þar sem hann lék tímabilið 2005/2006 en hann kom síðan til Breiðabliks fyrir sumarið 2007.

Hann á að baki langan landsliðsferil með yngri landsliðum Hollands þar sem hann lék frá U-14 ára landsliðinu upp í U-20 ára. Þar lék hann með Ryan Babel leikmanni Liverpool og Royston Drenthe sem núna leikur með Real Madrid svo einhverjir séu nefndir.

Ásamt Prince kom Magnús Már Lúðvíksson til liðsins í dag og gætu þeir leikið sinn fyrsta leik fyrir KR þegar liðið mætir Þrótti á morgun.