Valsmönnum hótað af gestunum frá Albaníu - Lögregla kölluð til

Gestirnir frá Albaníu voru allt annað en sáttir með þann langa uppbótartíma sem var spilaður í leiknum, þar sem jöfnunarmark Vals leit ekki dagsins ljós fyrr en á 99. mínútu.

Einn stjórnarmaður hjá Vllaznia brást illa við og kastaði flösku úr stúkunni í átt að dómaranum. Þá hræktu einhverjir úr stuðningsmannahópi gestanna á dómarateymið þegar það gekk af velli auk þess sem stjórnarmenn albanska liðsins eru sagðir hafa hótað stjórnarmönnum Vals lífláti ef þeir færu með liðinu út á seinni leikinn.

Þar að auki var kastað flösku í Tim Marshall, norður-írska dómara leiksins, þegar hann var á leið sinni af velli.

Lögregla var kölluð á svæðið til að reyna að hafa hemil á mönnum.

Stjórnarmennn Vals funduðu með eftirlitsmanni UEFA að leikslokum og fékk hann þær upptökur sem voru í boði.

Næstu skref eru óljós og er mögulegt að seinni leikurinn verði færður frá Albaníu í kjölfar þessara hótana.