Á föstudaginn verður opinberaður landsliðshópur fyrir umspilið þar sem mun ráðast hvort að Ísland spili á EM í sumar. Ísland mætir Ísrael í undanúrslitum umspilsins og ef sigur vinnst þá mætir Ísland annað hvort Bosníu & Hersegóvínu eða Úkraínu í úrslitaleik um sæti á EM. Leikurinn gegn Ísrael fer fram fimmtudaginn 21. mars.

Landsliðsþjálfarinn Age Hareide getur valið úr flestum af bestu leikmönnum þjóðarinnar en ansi ólíklegt er að hann velji Aron Einar Gunnarsson eða Gylfa Þór Sigurðsson þar sem þeir eru í lítilli leikæfingu. Hörður Björgvin Magnússon er að jafna sig eftir að hafa slitið hásin og Valgeir Lunddal Friðriksson hefur einungis spilað einn hálfleik síðan í október.

Albert Guðmundsson getur snúið aftur í landsliðið þar sem mál hans hefur verið fellt niður af héraðssaksóknara. Það er þó enn hægt að kæra þá niðurstöðu sem gæti haft áhrif á valið á Alberti. Hann hefur ekki verið í landsliðinu frá því í júní í fyrra.

Fótbolti.net setti saman líklegan landsliðshóp fyrir verkefnið. Ef hópurinn verður svona þá verða þrjár breytingar frá leiknum gegn Portúgal í nóvember. Aron Einar Gunnarsson, Stefán Teitur Þórðarson og Mikael Egill Ellertsson voru í þeim hóp. Inn í hópinn koma þeir Albert Guðmundsson, Mikael Anderson og Daníel Leó Grétarsson.