Rolando Bianchi til Manchester City (Staðfest)

Bianchi sem er ítalskur sóknarmaður gekkst undir læknisskoðun hjá félaginu í dag og er kaupverðið sagt vera um 8,8 milljónir punda.

Þetta eru fyrstu kaup Sven-Göran Eriksson fyrir City en Bianchi er 24 ára og á að baki nokkra U-21 árs landsleiki með Ítölum.

,,Hann skoraði tæp 20 mörk í Serie A sem er mikið í jafn erfiðri deild. Hann er ungur og það er mjög mikilvægt því hann á glæsta framtíð. Hann er góður fótboltamaður og mikill markaskorari, það er akkúrat það sem okkur vantaði," sagði fyrrum landsliðsþjálfari Englendinga.

Bianchi gæti spilað æfingaleik með liðinu strax á morgun gegn Doncaster en hann var í skýjunum með félagsskiptin.

,,Herra Eriksson hringdi í mig og sagði mér að hann vildi fá mig. Hann sagði ,,Komdu og spilaðu fyrir 50 þúsund manns í hverri viku og svo stefnum við á Evrópukeppnir." Þarna sannfærðist ég," sagði þessi sterki sóknarmaður.

City ollu miklum vonbrigðum á seinasta tímabili, enduðu í 14.sæti og áttu í miklum erfiðleikum með að skora en þeir skoruðu ekki mark á heimavelli frá 1.janúar og til loka tímabilsins. Þeir hafa misst tvo lykilmenn, þá Sylvain Distin og Joey Barton en talið er að Eriksson fái vænar fúlgur fjár til að eyða.