„Eintóm gleði, geggjaður liðssigur," sagði Pétur Heiðar aðstoðarþjálfari Þórs/KA eftir sigur liðsins gegn Breiðablik í Bestu deild kvenna í dag.
Lestu um leikinn: Þór/KA 3 - 2 Breiðablik
Leikurinn byrjaði af miklum krafti og fengu bæði lið mörg tækifæri til að skora snemma leiks.
„Mjög opið er vægt til orða tekið. Við hefðum getað verið búnar að skora þrjú á fyrstu tíu mínútunum og hefðum mögulega getað verið búnar að fá á okkur 1-2."
„Við byrjuðum leikinn af mjög miklum krafti eins og við lögðum upp með. Ætluðum að pressa þær mjög hátt og vinna boltann þar og okkur tókst það. Það var svekkjandi að vera ekki búnar að skora en svo skorum við á versta tíma fyrir hitt liðið og besta tíma fyrir okkur," sagði Pétur Heiðar.
„Svo fáum við aðeins í bakið, víti og heppnismark, mjög flott heppnismark reyndar en gegn gangi leiksins fannst manni."
Leikmenn Þór/KA misstu ekki trúna eftir að hafa tapað niður forystunni.
„Við lögðum upp með að það yrði liðsheild og andinn í liðinu myndi skila okkur langt. Það þýðir karakter og missa ekki trúna á neinu. Að fá á okkur tvö mörk í bakið er mjög vont. Við töpuðum illa á móti þeim síðast og töpum síðasta leik illa. Það er auðvelt að brotna niður og kóðna en við ákváðum að gera það ekki og vinna sigurmarkið," sagði Pétur.
Með sigri Þórs/KA í dag varð ljóst að Valur er Íslandsmeistari 2023.
„Þær eru yfirburðalið og vel verðskulað að vera meistarar. Búið að vera frábært tímabil hjá þeim. Líklega eina liðið sem maður hefur bara verið: Vá. Til hamingju Valsmenn,"
Bríet Fjóla Bjarnadóttir kom inn á sem varamaður undir lok leiksins. Bríet er yngsti leikmaðurinn til að spila í Bestu deildinni í sumar. Hún er fædd árið 2010. Fyrir leikinn í dag höfðu sex leikmenn í deildinni sem fæddir eru árið 2008 komið við sögu og er Bríet fædd tveimur árum síðar.
„Bríet Fjóla er 'once in a lifetime talent'. Hún er búin að vera æfa mikið með okkur. Hún átti að koma inn á fyrr í sumar en boltinn fór bara ekki útaf. Hún er búin að vera gera frábæra hluti í 3. flokki og 2. flokki. Mikill talent þarna á ferð," sagði Pétur.
„Þetta snérist ekki um að gefa henni tækifæri út af því að hún er ung heldur því við treystum henni í þetta verkefni. Í 2-2 þá vantaði okkur mark og við treystum henni í það, hún er bara komin þangað."
Munum við sjá Bríeti meira á vellinum á tímabilinu?
„Við þurfum að skoða það. Hún er í hörku keppni í 4. flokknum sínum í bikarúrslitum og úrslitum Íslandsmótsins. Við þurfum að púsla því saman og sjá hvort það passi við okkar plön," sagði Pétur.
Myndirnar af Bríeti eru birtar með leyfi Egils Bjarna Friðjónssonar sem myndaði leikinn í dag
