Rúnar Kristinsson.
Fram varð fyrsta liðið til að ná stigi af KR í Bestu deildinni þetta sumarið er liðið gerði 2-2 jafntefli við Vesturbæinga fyrr í kvöld.
Staðan var jöfn í hálfleik en á 84. mínútu komust KR-ingar yfir en sex mínútum síðar jöfnuðu Framarar metin með marki úr hornspyrnu.
Fótbolti.net ræddi við Rúnar Kristinsson, þjálfara Fram, eftir leik.
Staðan var jöfn í hálfleik en á 84. mínútu komust KR-ingar yfir en sex mínútum síðar jöfnuðu Framarar metin með marki úr hornspyrnu.
Fótbolti.net ræddi við Rúnar Kristinsson, þjálfara Fram, eftir leik.
„Ég er sáttur eftir að hafa lent 2-1 undir í restina. Ég hefði viljað öll stigin, engin spurning. Þetta er leikur sem við getum verið svekktir yfir að hafa ekki unnið en að sama skapi held ég að maður taki alltaf jafntefli. Ég held að það séu sanngjörnustu úrslitin úr þessum leik.“
Ertu ánægður með spilamennskuna?
„Nei, mér fannst við ekki eiga einn af okkar betri leikjum í sumar. Sérstaklega með boltann fannst mér við ekki nægilega flinkir að finna samherja til að komast í betri skyndisóknir og hræða þá meira. Mér fannst það ekki nægilega gott í síðari hálfleik.“
Það var flautað meira á Fram heldur en KR, ósáttur við það?
„Já, þess vegna var ég tuðandi allan leikinn. Ég er svo smámunasamur og það er dálítið leiðinlegt að vera svona. Ég var í miklu sambandi við fjórða dómarann (Gunnar Odd) í dag og bið hann velvirðingar á því. Ég held að ég hafi haft rétt fyrir mér ef maður skoðar tölfræðina. Hann flautaði sautján aukaspyrnur á Fram en sex á KR í öllum leiknum. Það fannst mér alveg galið.“
Viðtalið má sjá í heild sinni í spilaranum hér að ofan.
