Eggert Gunnþór til Wolves (Staðfest)

Félögin hafa náð samkomulagi um kaupverð og Eggert mun ganga formlega í raðir Wolves þegar félagaskiptaglugginn opnar þann 1. janúar. Samningur Eggerts við Hearts átti að renna út næsta sumar en talið er að Wolves muni borga 250 þúsund pund fyrir leikmanninn.

Eggert stóðst sjálfur læknisskoðun hjá Wolves fyrir leik liðsins gegn Norwich í ensku úrvalsdeildinni í gærkvöldi en hann var síðan á meðal áhorfenda á leiknum.

,,Þetta er tækifæri til að taka stórt skref upp á við á ferlinum og við óskum honum alls hins besta í framtíðinni,\" sagði talsmaður Hearts á heimasíðu félagsins í dag.

Eggert, sem er 23 ára gamall, ólst upp hjá Fjarðabyggð áður en hann gekk til liðs við Hearts árið 2005. Síðan þá hefur Eggert skorað níu mörk í 153 deildarleikjum með Hearts en hann hefur leikið allar stöður í vörninni hjá liðinu sem og á miðjunni.

Eggert gæti spilað sinn fyrsta leik með Wolves þegar liðið mætir Chelsea mánudaginn 2. janúar en hann mun hefja æfingar með Úlfunum í næstu viku.