Ísland vann langþráðan 2-0 sigur á Norður-Írlandi fyrr í kvöld. Liðið hafði verið án sigurs í síðustu níu keppnisleikjum fyrir leik kvöldsins. Ísland fer því með tveggja marka forystu inn í seinni leikinn sem fer fram næstkomandi þriðjudag á Laugardalsvelli.
Hér fyrir neðan má sjá einkunnagjöf Fótbolta.net úr leiknum.
Cecilía Rán Rúnarsdóttir (m) - 7
Kom varla við boltann í fyrri hálfleik, fékk þó að vera aðeins með í þeim síðari en þurfti þó aldrei að reyna á sig.
Sandra María Jessen - 6
Fékk góðar stöður sem hefði mátt nýta betur. Ísland á ekki að þurfa að treysta á föst leikatriði þegar gæðamunurinn á milli liðanna er eins mikill og var í kvöld.
Glódís Perla Viggósdóttir (f) - 8
Fyrirliðinn braut ísinn og var örugg í öllum sínum aðgerðum í dag. Gríðarlega mikilvæg í uppspilinu sem og varnarlega, sem þó reyndi lítið á í dag.
Ingibjörg Sigurðardóttir - 7
Skoraði seinna mark liðsins með góðum skalla. Hafði átt í nokkrum erfiðleikum í uppspili liðsins þó þar áður, of margar sendingar sem hittu ekki á samherja.
Alexandra Jóhannsdóttir - 6
Örugg og traust á miðjunni en fékk óþarfa gult spjald.
Karólína Lea Vilhjálmsdóttir - 8
Karólína átti tvær frábærar stoðsendingar í mörkunum tveimur sem komu bæði úr föstum leikatriðum.
Hlín Eiríksdóttir - 6
Brenndi af góðu færi í fyrri hálfleik þar sem varnarmaður bjargaði á línu. Hún hafði svo hægt um sig í síðari hálfleik.
Hildur Antonsdóttir - 6
Byrjaði framar en vanalega, kom sér í ágætar stöður en vantaði upp á herslumuninn.
Guðrún Arnardóttir - 6
Átti í álíka brasi og Ingibjörg fyrri hluta leiks, erfiðleikar með sendingar á samherja. Þó engin stórvægileg mistök.
Sædís Rún Heiðarsdóttir - 7
Sædís flott í vinstri bakverðinum. Kom með góðar fyrirgjafir, þá sérstaklega í fyrri hálfleiknum.
Sveindís Jane Jónsdóttir - 8
Óheppin að komast ekki á blað, átti bæði skot í stöng og í slá í fyrri hálfleik. Ágætis hraði sem hún býr yfir og nýtti hann vel í dag. Fór þó aðeins minna fyrir henni í seinni hálfleik.
Varamenn:
Diljá Ýr Zomers - 6
Katla Tryggvadóttir - 6
Amanda Jacobsen Andradóttir - 6
Aðrar spiluðu ekki nóg til að fá einkunn.
