Helga Sjöfn Jóhannesdóttir í Val (Staðfest)

Helga Sjöfn, sem er 22 ára miðjumaður, hefur leikið með Stjörnunni undanfarin tvö ár en hún er uppalin hjá ÍA. Hún á að baki tvo A-landsleiki og hefur þar að auki leikið með öllum yngri landsliðum Íslands.

Auk Vals var Helga Sjöfn orðuð við Breiðablik fyrr í haust en nú er ljóst að hún mun spila á Hlíðarenda á næsta tímabili.

Á sama tíma og þetta eru mikil gleðitíðindi fyrir Val er þetta mikill missir fyrir Stjörnuna en Helga Sjöfn hefur gegnt lykilhlutverki hjá liðinu.

Nýrráðinn þjálfari liðsins, Þorkell Máni Pétursson á ærið verkefni fyrir höndum en auk Helgu Sjafnar hefur Harpa Þorsteinsdóttir, aðalmarkaskorari liðsins, leitað á önnur mið en hún gekk til liðs við Breiðablik fyrr í haust.