Brasilíski landsliðsþjálfarinn Tite er hæstánægður með líkamsástandið á Philippe Coutinho eftir dvöl hans á lánssamningi hjá FC Bayern á síðustu leiktíð.
Coutinho vann þrennuna með Bayern og segir Tite kantmanninn hafa bætt fjórum kílóum af vöðvum á sig á þessu eina tímabili.
Coutinho hefur verið að gera vel frá komu sinni aftur til Barcelona. Hann er kominn með tvö mörk og tvær stoðsendingar á 405 mínútum.
„Coutinho er leikmaður sem einbeitir sér mikið að styrktaræfingum og hann bætti sig gríðarlega á tíma sínum hjá Bayern. Hann þyngdist um fimm kíló hjá Bayern, fjögur þeirra voru vöðvar," sagði Tite.
Coutinho, 28 ára, er lykilmaður í brasilíska landsliðinu og hefur gert 18 mörk í 63 leikjum. Hann spilaði báða leikina í landsleikjahlénu og skoraði í 5-0 sigri gegn Bólivíu.
Athugasemdir
