Meistaradeild kvenna: Barcelona valtaði yfir Roma á Camp Nou

Barcelona er fyrsta liðið til að tryggja sér sæti í undanúrslitum Meistaradeildarinnar eftir öruggan sigur á Roma á Camp Nou í kvöld.

Spænska liðið var með 3-0 forystu í hálfleik en liðið var með öll völd á vellinum allan leikinn. Barcelona gerði algörlega út um viðureignina strax í síðari hálfleik þar sem staðan var orðin 5-0 eftir 53. mínútna leik.

Roma náði að klóra í bakkann eftir klukkutíma leik en það var þriðja skot liðsins að marki í leiknum.

Barcelona mætir annaðhvort Lyon eða Chelsea í undanúrslitum en Chelsea er með 1-0 forystu eftir fyrri leikinn í Frakklandi.