Arne Slot er með bakið upp við vegg
Dietmar Hamann, fyrrum leikmaður Liverpool, telur vera stutt í endalok Arne Slot hjá félaginu.
Slot tók við Liverpool á síðasta ári og gerði Liverpool að Englandsmeistara á fyrsta tímabili sínu.
Hins vegar hefur allt verið á afturfótunum frá því í mars á þessu ári og á þessari leiktíð hefur liðið tapað níu af síðustu tólf leikjum sínum.
Flestir miðlar eru sammála um að Slot fái að minnsta kosti þrjá leiki til að leysa vandamálin, en Hamann segir málið flókið og að það sé ekki hægt að finna auðvelda og fljóta lausn. Slot þarf að bretta upp ermar annars mun einhver annar taka stöðu hans.
„Það er stutt í endalok Arne Slot. Ég hélt aldrei að það kæmi að þessu eftir þetta frábæra tímabil sem hann átti, en ég held að inneignin sé að klárast hjá honum."
„Ég er á þeirri skoðun að Slot sé búinn að missa stjórn á liðinu. Þetta er að hrynja í sundur og alli eru bara að gera það sem þá langar til að gera, eins og Salah áður en PSV skoraði annað markið. Liverpool verður í miklum vandræðum með að klára tímabilið meðal fjögurra efstu í deildinni og tel ég að það sé ekki hægt að finna auðvelda eða fljóta lausn á þessu vandamáli. Staðan er svo flókin og alveg klárt mál að félagið muni ræða stöðu stjórans," sagði Hamann.
Liverpool heimsækir West Ham til Lundúna á morgun og fær síðan nýliða Sunderland í heimsókn á miðvikudag.
Athugasemdir
