Viktor Andri er kominn heim
Viktor Andri Hafþórsson er kominn aftur heim í Fjölni en hann kemur til félagsins frá Þrótti R.
Viktor er 24 ára gamall sóknarmaður sem spilaði með yngri flokkum Fjölnis og með meistaraflokki félagsins til 2022 áður en hann fór til Keflavíkur.
Síðustu tvö tímabil hefur hann spilað með Þrótti í Lengjudeildinni, en er nú kominn aftur heim í Fjölni.
Hann á 152 meistaraflokksleiki og 27 mörk á ferlinum, þar af 37 leiki í efstu deild.
„Ég er gríðarlega ánægður með að vera kominn aftur heim í Fjölni. Ég valdi Fjölni vegna þess að það er minn klúbbur og verður alltaf minn klúbbur. Ég var farinn að sakna þess að klæðast gulu treyjunni og mig langar að taka þátt í þessu verkefni sem framundan er og hjálpa liðinu að komast aftur á þann stað sem það á heima,“ sagði Viktor Andri.
Gunnar Már Guðmundsson, þjálfari Fjölnis, er í skýjunum með að fá Viktor aftur heim í Grafarvoginn.
„Við höfum haft augastað á Viktori í lengri tíma og er það frábært að hann velji okkur á þessum tímapunkti og komi heim í Fjölni að taka þátt í uppbyggingunni aftur. Viktor er mjög góður leikmaður sem ég bind miklar vonir við. Það verður gaman að sjá hann aftur í Fjölnistreyjunni að skora mörk fyrir okkur,“ sagði hann um komu Viktors.
Fjölnir mun spila í 2. deild næsta sumar eftir að hafa hafnað í botnsæti Lengjudeildarinnar á nýafstaðinni leiktíð.
Athugasemdir
