Markvörðurinn Aron Dagur Birnuson hefur verið lánaður frá Stjörnunni til Þróttar Reykjavíkur í Lengjudeildinni.
Hann mun leika með Þrótti R. á næstu leiktíð eftir að hafa verið varamarkvörður Stjörnunnar í ár. Í fyrra gerði hann frábæra hluti á milli stanganna hjá Grindavík í Lengjudeildinni sem varð til þess að Stjarnan krækti sér í hann.
Aron er 26 ára gamall og er með 18 leiki að baki í efstu deild eftir að hafa leikið þar með uppeldisfélagi sínu KA. Hann á 85 leiki í næstefstu deild og lék á sínum tíma 15 leiki fyrir unglingalandsliðin.
„Aron Dagur er öflugur markvörður með mikinn metnað og góða reynslu sem við fögnum mjög að gangi til liðs við Þrótt og teljum að koma hans styrki lið félagsins verulega. Framvegis verða tveir góðir markmenn hjá karlaliði félagsins og samkeppni mun aukast. Aron Dagur hefur alla burði til að verða framúrskarandi markvörður og við hlökkum til að vinna með honum og bjóðum hann velkominn í Þrótt," segir Kristján Kristjánsson, formaður fótboltadeildar Þróttar.
Aron mun berjast við Þórhall Ísak Guðmundsson um byrjunarliðssætið hjá Þrótti, sem fór í umspil Lengjudeildarinnar í haust en tapaði gegn HK í undanúrslitum.
Athugasemdir
