Lukaku til Roma (Staðfest)

Belgíski sóknarmaðurinn Romelu Lukaku er orðinn leikmaður ítalska félagsins Roma. Hann kemur til Jose Mourinho og lærisveina á lánssamningi frá Chelsea sem gildir út tímabilið.

„Móttökurnar sem ég hef fengið frá félaginu og stuðningsmönnum hafa gert mig spenntan. Þær hafa gefið mér enn meiri eldmóð," segir hinn þrítugi Lukaku við heimasíðu Roma.

Hann hefur leikið á láni hjá Inter tvívegis, varð Ítalíumeistari með liðinu 2021 og bikarmeistari á síðasta tímabili. Þá hjálpaði hann liðinu að komast í úrslitaleik Meistaradeildarinnar fyrr á þessu ári.