Í boði Bónus og Arion banka
Helgina 25. og 26. júní var haldið mjög vel heppnað mót á Egilsstöðum fyrir 6. og 7. flokk karla og kvenna. Nálægt 300 keppendur mættu til leiks og spiluðu við frábærar aðstæður til knattspyrnuiðkunar, þó foreldrar hefðu alveg vilja hafa aðeins hlýrra.
Þó var það samdóma álit manna að veðrið hefði sloppið ótrúlega vel miðað við aðstæður. Höttur hefur haldið mót af þessu tagi í langan tíma, en nú var í fyrsta sinn um tveggja daga mót að ræða og þátttakendur fleiri en venjulega.
Allir fengu frítt í sund, hamborgara- og pylsupartý, hoppukastalar, Ingó veðurguð sló í gegn á kvöldvökunni og Arion banki gaf glæsilegar þátttökugjafir. Bónus var aðalstyrktaraðili mótsins sem gekk afar vel og leikgleðin í fyrirrúmi eins og myndirnar sýna.
Aðstæður til mótahalds af þessum toga eru til fyrirmyndar á Egilsstöðum, en mótið var leikið á gervigrasvellinum í Fellabæ, krakkarnir gistu í grunnskólanum þar við eða á tjaldstæðinu á Skipalæk og matur var framreiddur við íþróttahúsið í Fellabæ. Hattarmenn eru ánægðir með hvernig til tókst og vonast eftir enn betri þátttöku á næsta ári.