Landsliðskonan Gunnhildur Yrsa Jónsdóttir var í byrjunarliðinu og spilaði allan leikinn er Valerenga laut í lægra haldi gegn Lilleström í úrvalsdeild kvenna í Noregi í dag.

Gunnhildur er komin með fyrirliðabandið hjá Valerenga þrátt fyrir að hafa aðeins komið til liðsins fyrir tímabilið.

Hún lék allan leikinn í dag er liðið tapaði 2-1 gegn Lilleström.

Lilleström leiddi 2-0 í hálfleik, en Valerenga náði að minnka muninn snemma í seinni hálfleiknum. Þær komust hins vegar ekki lengra.

Valerenga er um miðja deild í norsku úrvalsdeildinni, en Lilleström, andstæðingurinn í dag, er á toppi deildarinnar.

Gunnhildur Yrsa er á leið á EM með Íslandi í næsta mánuði, en á því móti mun hún væntanlega spila í stöðu hægri vængbakvarðar.