Andrea Mist var frábær á miðjunni hjá Þór/KA í dag
„Við byrjuðum ekkert rosalega vel. Við vorum eitthvað voða sjúskaðar þarna í fyrri hálfleik en við settum tvö góð mörk sem gaf okkur kraft inn í seinni hálfleik,“ sagði Andrea Mist Pálsdóttir sem átti virkilega góðan leik á miðjunni hjá Íslandsmeisturum Þórs/KA þegar þær sóttu 3 stig í Kaplakrika fyrr í dag.
Lestu um leikinn: FH 1 - 4 Þór/KA
FH lét gestina hafa fyrir hlutunum í fyrri hálfleik og það var hart barist og tekist á í leiknum. Andrea Mist kann vel við sig í svoleiðis leikjum.
„FH voru bara gríðarlega sterkar. Þær komu sterkar til leiks og það var mikil barátta í þeim.“
„Það eru skemmtilegustu leikirnir. Það er gott að hafa smá baráttu og hafa leikinn svolítið tense. Það gerir þetta skemmtilegra.“
Þór/KA tók völdin á vellinum í síðari hálfleik og bætti við tveimur mörkum. Andrea Mist komst á blað með afar sérstöku marki en hún náði einhvernveginn að koma boltanum í markið og standa í lappirnar eftir að keyrt var inn í hliðina á henni. Hvað gerðist eiginlega í markinu?
„Ég veit það ekki einu sinni! Ég bara sneri mér í hringi og sá ekki að boltinn væri inni. En ég er rosalega glöð að hafa skorað mitt fyrsta mark á þessu seasoni.“
Þór/KA er með fullt hús stiga eftir fyrstu fimm umferðirnar og byrjar mótið af miklum krafti. Aðspurð um það hvort eitthvað lið gæti stöðvað Íslandsmeistarana svaraði Andrea Mist ákveðin:
„Nei. Það er ekki svoleiðis. Eins og Donni hefur sagt í öllum viðtölum þá ætlum við að vinna alla leiki í sumar.“
Nánar er rætt við miðjumanninn knáa í sjónvarpinu hér að ofan.
Athugasemdir
