Hann segir úrslit leiksins hafa verið sanngjörn og Liverpool hafi gefið leikinn frá sér.

„Ég verð að byrja á að segja að þetta var verðskuldaður sigur Bournemouth. Þeir sýndu alvöru baráttu. Við gefum leikinn frá okkur á erfiðum tíma. Við opnum dyrnar fyrir þeim og þeir ganga inn og loka leiknum með nokkrum frábærum mörkum. Þeir eiga þetta skilið,"

„Jafnvel þó við séum komnir í 2-0 verðum við að halda áfram að spila fótbolta. Við missum leikinn úr okkar höndum af því að við hættum því," segir Klopp.

Þjóðverjinn litríki er sannfærður um að þetta tap muni kenna liðsmönnum Liverpool mikilvæga lexíu.

„Ef við lærum af þessu er þetta allt í lagi. Leikurinn er ekki búinn þó staðan sé 2-1 eða 3-0. Við verðum að læra af þessu. Okkur líður ekki vel núna en stundum þarftu á svona skell að halda. Að sjálfsögðu getur þetta hjálpað okkur."

„Þetta eru þrjú stig og ekkert meira. Svona hlutir gerast. Það verður enginn meistari í desember og það fellur heldur enginn í desember. Grunnatriðin eru í lagi hjá okkur en við verðum að nýta gæðin í okkar liði betur," segir Klopp.