Tottenham hefði komist upp í fjórða sæti ensku úrvalsdeildarinnar með sigri en tókst ekki.

„Við vorum ekki nægilega góðir í dag, sérstaklega í seinni hálfleik. Við erum stoltir af því að spila fótbolta sem einkennist af miklum hraða og ákefð, en það var ekki að sjá í þessum seinni hálfleik," sagði Postecoglou að leikslokum og ítrekar að hann telji frammistöðuna skipta meira máli heldur en úrslitin.

„Ég lít ekki á fjórða sætið sem eitthvað heilagt markmið. Ég vil ekki enda í fjórða sæti ef við höfum ekki vaxið sem lið. Mér er sama þó að enginn trúi mér. Það sem skiptir mestu máli er þróun liðsins, markmiðið okkar er að verða betri með hverri vikunni.

„Þetta var slæmur dagur hjá okkur í dag og við megum ekki samþykkja þetta. Við verðum að gera betur í framtíðinni."

Tottenham er tveimur stigum á eftir Aston Villa í baráttunni um síðasta meistaradeildarsæti úrvalsdeildarinnar.

„Við erum tveimur stigum á eftir Villa og það eru 10 leikir eftir af tímabilinu, auðvitað getur allt ennþá gerst. Ég er ekkert að spá í því. Þetta snýst ekki bara um að vera í góðri stöðu í deildinni heldur snýst þetta meira um hvernig við erum að spila."