Valentina er 25 ára markvörður frá Venesúela sem lék með Clayton State háskólanum í bandaríska háskólaboltanum áður en hún hélt til Íslands í fyrsta sinn í fyrra.

Hún fékk ekki tækifæri með meistaraflokki ÍBV en lék með U20 liðinu áður en hún samdi við félag í Búlgaríu.

Valentina var því búsett í Búlgaríu í vetur en ætlar að taka komandi sumar í Vestmannaeyjum.

ÍBV féll úr Bestu deild kvenna í fyrra og leikur því í Lengjudeildinni í ár. Valentina mun berjast við Guðnýju Geirsdóttur um sæti í byrjunarliðinu.

ÍBV hefur leik í sumar með bikarleik við Aftureldingu 1. maí á Hásteinsvelli en fyrsti leikurinn í Lengjudeildinni er einnig gegn Aftureldingu, þó á útivelli, þann 5. maí.