Kolbeinn Sigþórsson, framherji íslenska landsliðsins, var að vonum svekktur eftir 2-1 tapið gegn Tékklandi í undankeppni EM 2016 í Plzen í kvöld.
Lestu um leikinn: Tékkland 2 - 1 Ísland
,,Það vantaði einbeitningu. Við vorum of varkárir líka í okkar spili og kláruðum ekki okkar færi. Við náum að koma okkur í 1-0 og erum í fínni stöðu en vörðumst kannski of mikið. Það komu opnari færi fyrir okkur þegar við loksins settum pressu, en við verðum að viðurkenna að við vorum ekki betra liðið í dag. En miðað við færi hefðum við getað skorað þrjú," sagði Kolbeinn við Fótbolta.net.
Kolbeinn fékk eitt færi skömmu fyrir leikhlé í stöðunni 1-0 fyrir Íslandi en varnarmaður Tékklands komst í veg fyrir hann.
,,Þetta var erfitt færi, þetta lúkkaði örugglega "easy" en varnarmaðurinn fannst mér vera utan í mér og ég fékk ekki nægan tíma til að geta klárað færið nógu vel. Þetta var pínu klafs, þeir voru heppnir þarna, hann fór í varnarmann og svo í markmann held ég."
,,Mér fannst dómarinn skelfilegur í þessum leik. Hann dæmdi allt of mikið á okkur, fannst mér. En ég ætla ekki að fara að kenna dómaranum um tapið þó hann hafi verið lélegur."
Athugasemdir