Marco Asensio, ein af vonarstjörnum knattspyrnunnar, hefur engan áhuga á því að fara til franska stórliðsins Paris Saint-Germain.
Asensio, sem er 21 árs gamall, hefur byrjað tímabilið með Real Madrid af krafti og skorað tvö gullfalleg mörk í Ofurbikar Spánar gegn Barcelona.
Hann skoraði í fyrri og seinni leiknum en bæði mörkin voru afar falleg. Hann hefur verið orðaður við mörg lið undanfarnar vikur en hann virðist hafa lítinn áhuga á því að yfirgefa spænska stórliðið.
„Hvað væri PSG til í að eyða miklum peningum til þess að fá mig? Ég segi bara nei, takk," sagði Asensio.
„Ég er mjög ungur en hef verið í atvinnumennskunni í dágóðan tíma og veit hvernig hlutirnir virka. Þeir tala vel um mig en ég pæli ekkert í þessu," sagði hann í lokin.
Athugasemdir