Fótbolti.net ræddi við Helga Kolviðsson, aðstoðarlandsliðsþjálfara, við upphaf æfingarinnar og byrjaði að spyrja út í standið á mönnum en nokkrir í hópnum hafa verið að glíma við smávægileg meiðsli eða eru að koma úr meiðslum.

„Þetta er ekki alveg komið í ljós, það var langt ferðalag á mánudaginn og við höfum aðeins meira verið að leyfa þeim að hreyfa sig. Við fáum væntanlega meiri upplýsingar eftir daginn í dag," segir Helgi.

Það eru 29 leikmenn í Bandaríkjahópnum en 23 verða valdir í lokahópinn sem fer til Rússlands í sumar.

„Það er spenna í mönnum en þeir eru líka einbeittir. Þannig viljum við hafa það, æfingarnar verða betri og allir eru á tánum. Allt eins og það á að vera. Maður er strax farinn að kvíða fyrir því að velja bara 23. Það verður gríðarlega erfitt og þannig á það líka að vera."

Hvernig má búast við því að leikurinn gegn Mexíkó verði?

„Þeir eru með þjálfara frá Kólumbíu sem spilar ákveðinn leikstíl. Mexíkó er gríðarlega sterkt lið og spurning hvort þeir ætli að prófa eitthvað annað en þeir hafa gert að undanförnu. Maður þarf að aðlagast aðstæðum hratt en að eru toppleikmenn í öllum stöðum og þetta verður mjög krefjandi," segir Helgi en viðtalið er í heild í sjónvarpinu hér að ofan.