„Við erum alltaf ánægðar með þrjú stig. Við hefðum getað spilað betur. Seinni hálfleikurinn var ekki upp á marga fiska hjá okkur. Við erum sáttar með þrjú stig," sagði fyrirliði Stjörnunnar, Katrín Ásbjörnsdóttir eftir 3-1 sigur liðsins gegn FH í 6. umferð Pepsi-deildar kvenna í kvöld.
Lestu um leikinn: FH 1 - 3 Stjarnan
„Þær áttu ekki nein dauðafæri en þær gáfu okkur hörkuleik og við förum ánægðar heim með þrjú stig."
Ein af betri leikmönnum Stjörnunnar, Ana Victoria Cate fékk beint rautt spjald tíu mínútum fyrir leikslok fyrir að óíþróttamannslega hegðun fjarri boltanum. Hún verður því í banni í næsta leik þegar Stjarnan tekur á móti Þór/KA í toppslag.
„Þetta er mjög svekkjandi upp á næsta leik að gera. Þetta er svolítið klaufalegt en svona er þetta. Þær voru búnar að vera kítast á undan. Ég sá ekki nákvæmlega hvað átti sér stað."
Katrín skoraði tvívegis í leiknum og er því komin með átta mörk í deildinni í sumar. Með fullri virðingu, þá verður hún samt sem áður að fara vinna í betri fögnum með þessu áframhaldi.
„Ég held áfram að skora og það er flott. Ég er alveg sammála þér, þetta er alveg skelfilegt. Ég er ekki með neinar hugmyndir eins og er, en ég fer að vinna í því og kem með eitthvað betra næst."
„Það er sex stiga leikur á okkar heimavelli. Við ætlum okkur að taka þrjú stig þar," sagði markaskorarinn mikli og fyrirliði Stjörnunnar að lokum aðspurð út í toppslaginn gegn Þór/KA í næstu umferð.
Viðtalið í heild sinni má sjá í sjónvarpinu hér að ofan.
Athugasemdir