Atli Gunnar Guðmundsson átti góðan leik þegar Huginn náði frábæru jafntefli á útivelli gegn toppbaráttuliði Grindavíkur í Inkasso-deildinni fyrr í kvöld.
Leikmenn Hugins héldu 2-1 forystu allt þar til í blálokin þegar Alexander Veigar Þórarinsson jafnaði með skallamarki.
Leikmenn Hugins héldu 2-1 forystu allt þar til í blálokin þegar Alexander Veigar Þórarinsson jafnaði með skallamarki.
„Þetta var mjög erfiður leikur og menn gáfu sig alla í þetta, enda uppskárum við eitt stig sem hefðu átt að vera þrjú," sagði sársvekktur Atli að leikslokum.
„Við vörðumst vel og vorum ekki með neitt rugl. Svo fáum við þetta óþvegið í andlitið og það var mjög, mjög, mjög sárt.
„Mig langar að sökkva ofan í jörðina, líka því að ég veit alveg minn þátt í þessu marki. Ég á að gera betur, ég veit það og það gerir þetta ennþá verra. En eins og ég segi þá tökum við stig á mjög erfiðum útivelli, það er grátlegt samt að missa þetta svona niður."
Atli Gunnar varði vítaspyrnu frá Andra Rúnari Bjarnasyni í síðari hálfleik, auk níu annarra skota sem hann fékk á sig í leiknum. Skotin sem komu að marki Hugins í leiknum voru rúmlega 30.
„Ég ætla ekki að vera að ljúga að þér, ég ákvað bara horn, fór bara í það og hann skaut í það. Ég er ekki alveg nógu góður í að lesa vítaspyrnur," sagði Atli Gunnar um vítavörsluna.
Athugasemdir
