Breiðablik er komið aftur á sigurbraut í Pepsi-deild kvenna, en liðið fór á Selfoss og heimsótti heimakonur í dag.

Íslandsmeistarar Breiðabliks komust yfir á 27. mínútu þegar Esther Rós Arnarsdóttir skoraði, 1-0.

Fimm mínútum síðar bætti Fanndís Friðriksdóttir við marki og staðan var því 2-0 þegar liðin gengu til búningsklefa.

Í síðari hálfleik minnkaði Selfoss muninn, en Lauren Elizabeth Hughes átti þá skot sem fór af varnarmanni Blika og þaðan í netið.

Selfoss komst ekki lengra og sigur Blika því niðurstaðan, en Breiðablik er nú í 2. sætinu með átta stig, tveimur stigum á eftir Stjörnunni. Selfoss er í 5. sætinu með sex stig.