Bayern skellti sér í æfingaferð til Doha í Katar í vetrarfríinu og fór liðið meðal annars á leiki í HM í handbolta til að stytta sér stundir.

„Ég held að við séum vel tilbúnir fyrir leikinn gegn Wolfsburg. Það er gott að mæta liðinu í öðru sæti því þá þurfum við að finna taktinn strax aftur. Wolfsburg hefur spilað gríðarlega vel á tímabilinu svo þetta verður erfiður leikur," segir Pep Guardiola, þjálfari Bæjara.

„Við teljum að fyrstu leikirnir eftir vetrarfrí séu mjög mikilvægir því ef við getum unnið þá erum við búnir að taka stórt skref í átt að því að verja titilinn."

Kollegi Guardiola, Dieter Hecking, hefur verið að gera flotta hluti á tímabilinu en liðið hefur aðeins tapað einu sinni í síðustu 12 deildarleikjum. Liðið er mun heilsteyptara en á síðasta tímabili þegar liðið tapaði 6-1 fyrir Bayern á Volkswagen Arena.

Ivan Perisic og Naldo hafa báðir jafnað sig eftir meiðsli en sá síðarnefndi hefur verið hreinlega magnaður í vörn liðsins á tímabilinu. Brasilíumaðurinn hefur verið sem klettur í vörninni auk þess að skora fimm sinnum.