Barcelona er aftur komið á toppinn á Spáni, en liðið hafði betur gegn Real Betis í kvöld.

Fyrri hálfleikurinn var markalaus, en þó gerðist mikið í honum og var dómari leiksins þar í aðalhlutverki. Hann gaf nefnilega sjö gul spjöld og eitt rautt, en það fékk Heiko Westermann, varnarmaður Real Betis.

Það var hins vegar rólegra yfir spjöldunum í seinni hálfleik, en aðeins eitt fór á loft í. Mörkin fóru þó að rúlla í seinni hálfleiknum.

Það fyrsta kom eftir fjórar mínútur, en það skoraði Ivan Rakitic fyrir Barcelona. Luis Suarez bætti síðan við öðru marki á 81. mínútu eftir stórkostlegan undirbúning frá Lionel Messi.

Ekki voru fleiri mörk skoruð, en Barcelona endurheimti toppsæti deildarinnar með sigrinum. Atletico fór á toppinn fyrr í dag, en það entist ekki lengi. Betis er í 13. sæti með 41 stig.