Lesendur hafa meiri trú á Víkingum en Blikum

Lesendur Fótbolta.net hafa meiri trú á því að Víkingur frekar en Breiðablik muni enda uppi sem sigurvegari á Íslandsmótinu 2024. Þessi tvö lið eru í einvígi um toppsæti Bestu deildarinnar og niðurstaðan ræðst mögulega ekki fyrr en í hreinum úrslitaleik í lokaumferðinni.

Liðin eiga þrjá leiki eftir en það verða áhugaverðir leikir í dag; Víkingur fær Stjörnuna í heimsókn og svo tekur Breiðablik á móti Val.

Víkingur og Breiðablik eru jöfn að stigum en Víkingur er með betri markatölu og það gæti mögulega á endanum ráðið úrslitum í þessari æsispennandi baráttu.

Í skoðanakönnun sem var á forsíðu spá 57% því að Víkingur vinni titilinn en 43% að það verði Breiðablik.