Pepsi Max-kvenna: Valur sigraði þrátt fyrir stórleik Birtu

Margrét Lára Viðarsdóttir gerði eina markið er Valur sigraði Stjörnuna í síðasta leik þriðju umferðar Pepsi Max-deildar kvenna.

Valur stjórnaði leiknum frá fyrstu til síðustu mínútu og hreinlega ótrúlegt að liðið hafi ekki skorað fleiri mörk. Stjörnustúlkur geta þakkað Birtu Guðlaugsdóttur í markinu fyrir það, því hún átti stórleik og varði hvert skotið fætur öðru.

Birta er aðeins 18 ára gömul og er þetta fyrsta markið sem hún fær á sig á tímabilinu, Stjarnan vann 1-0 í fyrstu tveimur umferðunum og fékk Birta mikið lof fyrir sína frammistöðu.

Valur er ásamt Breiðabliki á toppi deildarinnar með níu stig eftir þrjá leiki. Stjarnan er með sex stig.