Breiðablik lagði ÍBV að velli með tveimur mörkum gegn engu í Pepsi-deildinni í kvöld.

Ellert Hreinsson gerði fyrsta mark leiksins strax á þriðju mínútu þegar boltinn hrökk til hans innan vítateigs heimamanna.

Þremur mínútum síðar komu Blikar knettinum í stöngina og þaðan fór hann í bakið á Derby Rafael Carilloberduo og inn.

Bæði lið fengu tækifæri til að bæta mörkum við leikinn en báðir markverðir voru vel á verði.

Jonathan Ricardo Glenn fékk gult spjald fyrir leikaraskap snemma í síðari hálfleik. Hann gaf Avni Pepa svo olnbogaskot en ekkert var dæmt á það og fimm mínútum síðar var það Jón Ingason sem fékk olnboga frá Glenn í andlitið. Það sá dómarinn og gaf Glenn annað gult spjald.

Eyjamenn voru mikið í sókn í síðari hálfleik en náðu ekki að skapa sér mikið. Vörn Blika hélt vel og skilaði mikilvægum sigri í toppbaráttunni.