Rúnar Kristinsson, þjálfari Fram, var ánægður með 2-0 sigur á FH á heimavelli í kvöld eftir tvo tapleiki í röð.
„Ég er ofboðslega sáttur. Það er frábært að vinna FH og þetta er hörkulið sem er erfitt að spila við. Mér fannst við gera frábærlega í að verja markið okkar í dag, þrátt fyrir að þeir fengu fulloft að koma boltanum inn í. Við vorum að reyna forðast það en eftir 1-0 féllum við fullmikið til baka," sagði Rúnar.
Lestu um leikinn: Fram 2 - 0 FH
Vuk Oskar Dimitrijevic, leikmaður Fram, hefur heldur betur fest sig í sessi í Framtreyjunni og er kominn með sex mörk í ellefu leikjum.
„Við erum að gefa honum trú, sjálfstraust og leyfa honum að spila eins og hann vill spila en með einhverjum takmörkunum. Hann hefur bara fengið að blómstra í þessu hlutverki sínu og það hentar okkur vel að hafa hann frammi í tveggja framherja kerfinu okkar."
Fred Saraiva, lykilleikmaður Fram, hefur verið að glíma við meiðsli og kom í fyrsta skiptið inn á síðan 10. maí í kvöld.
„Algjörlega geggjað að fá hann aftur. Maður bara sér róna sem kemur yfir allt liðið þegar hann kemur inn á. Hann er bara það öruggur á boltanum og Simon er öruggur á boltanum. Að hafa tvo svona gaura á miðsvæðinu þegar við þurfum að passa boltann betur, sér maður stóran mun á liðinu."
