Margrét Lára Viðarsdóttir í eitt besta lið heims (Staðfest)

Margrét Lára hefur leikið undanfarin þrjú ár með sænska liðinu Kristianstad en tilkynnti eftir leik liðsins gegn Dalfjörs í lokaumferð sænsku deildarinnar rétt í þessu að hún hafi ákveðið að taka tilboði þýska félagsins. Hún skoraði þrennu í lokaleiknum í dag í 5-1 sigri.

Hún fær ekki leikheimild í þýskalandi fyrr en þegar félagaskiptaglugginn opnar í janúar næstkomandi en þá er þýska deildin í vetrarríi fram í febrúar. Hún má þó leika bikarleiki þrátt fyrir það.

Margrét Lára hefur áður leikið í Þýskalandi því hún var hjá Duisburg í skamman tíma tímabilið 2006-2007 en sneri aftur ti l Íslands og lék með Val í tvö ár. Hún fór aftur í atvinnumennsku til Linköping í Svíþjóð árið 2008 þaðan sem hún fór til Kristianstad.

Hún er ein besta knattspyrnukona sem Ísland hefur átt og hefur leikið 75 leiki fyrir Ísland og skorað í þeim 63 mörk. Hún hefur glímt mikið við meiðsli undanfarin ár og ekki getað beitt sér að fullu en hefur verið að ná sér og skoraði 16 mörk á tímabilinu sem var að ljúka í Svíþjóð.

Turbine Potsdam hefur unnið þýsku Bundesliguna undanfarin þrjú ár. Liðið vann Meistaradeild kvenna árið 2010 og komst í úrslitaleikinn árið 2011. Liðið kom hingað til lands í síðasta mánuði og mætti Þór/KA í Meistaradeildini. Samanlagður sigur þýska liðsins í viðureigninni var 14-2.