Besta deildin: Elías Már með þrennu og Víkingar óstöðvandi

Íslandsmeistarar Víkings unnu magnaðan 5-0 stórsigur á Fram í 11. umferð Bestu deildar karla á Lambhagavellinum í Úlfarsárdal í kvöld. Elías Már Ómarsson skoraði þrennu og er kominn með tólf deildarmörk á tímabilinu.

Fyrir leikinn hafði Fram verið taplaust í sjö leikjum í röð, með sex sigra og eitt jafntefli, en Víkingar höfðu ekki tapað deildarleik síðan í ágúst á síðasta ári.

Meistararnir bættu enn einum sigrinum í safnið og það með miklum stæl.

Það var mikil spenna og eftirvænting fyrir leiknum en fátt um fína drætti fyrsta hálftímann. Aron Elís Þrándarson skoraði úr fyrsta alvöru færi leiksins á 32. mínútu þegar Helgi Guðjónsson átti flottan bolta á fjærstöngina á Karl Friðleif Gunnarsson. Karl skallaði boltann fyrir Aron sem stýrði honum í þaknetið.

Markið kveikti í Víkingum sem sköpuðu sér nokkur hættuleg færi í kjölfarið áður en annað markið kom eftir stórkostlegt spil. Þar batt Elías Már endahnútinn á frábæra sókn og Víkingar fóru með tveggja marka forystu inn í hálfleikinn.

Það var áfram mikill neisti í Víkingum þegar síðari hálfleikur hófst og Elías bætti fljótlega við sínu öðru marki. Aron Elís fékk nægan tíma hægra megin í teignum og sendi boltann á fjærstöngina þar sem Elías setti hann yfir Viktor í markinu og í netið.

Elías fullkomnaði þrennuna á 65. mínútu. Daníel Hafsteinsson keyrði þá inn á teig Framara, kom boltanum fyrir á Elías sem laumaði honum framhjá Viktori. Ótrúleg endurkoma hans í deildina heldur áfram en hann er kominn með tólf mörk og er markahæstur, þremur mörkum á undan næsta manni.

Víkingar fengu vítaspyrnu á 77. mínútu þegar Viktor tók Gylfa Þór Sigurðsson niður eftir aukaspyrnu Daníels. Helgi Guðjónsson fór á punktinn og skoraði fimmta mark Víkings.

Fimm stjörnu frammistaða hjá Víkingum sem eru óstöðvandi í byrjun leiktíðar. Þeir hafa verið einfaldlega besta lið landsins til þessa í sumar.

Víkingar eru á toppnum með 31 stig eftir ellefu leiki. Sigurganga Fram er á enda en liðið er áfram í 3. sæti með 23 stig.