Man City leiðir kapphlaupið um Musiala - Man Utd hefur áhuga á Toney - Arsenal endurskoðar áætlanir
   fim 22. febrúar 2024 18:20
Ívan Guðjón Baldursson
Reynir sækir liðsstyrk frá Keflavík og Njarðvík (Staðfest)
Mynd: Fótbolti.net - Hafliði Breiðfjörð
Mynd: Reynir S.
Reynir Sandgerði vann 3. deild karla í fyrra og var að ná í tvo mikilvæga leikmenn til að styrkja byrjunarliðið fyrir komandi átök í 2. deildinni.

Reynir sótti leikmenn sem spiluðu í Bestu deildinni og Lengjudeildinni á síðustu leiktíð, Daníel Gylfason sem lék í efstu deild með Keflavík og Magnús Magnússon sem lék í næstefstu deild með Njarðvík.

Daníel lék síðast fyrir Reyni sumarið 2018 en eftir það varð hann lykilmaður í liði Kórdrengja sem klifraði hratt upp íslenska deildakerfið, en tókst ekki að skrá sig í tæka tíð fyrir síðasta Íslandsmót. Hann lék því fyrir Árbæ í 3. deildinni og Keflavík í Bestu deildinni í fyrra, en núna heldur hann áfram sínum ferli í 2. deildinni.

Daníel, sem er fæddur 1993, hefur afrekað það að spila yfir 10 leiki í hverri einustu deild íslenska boltans, að undanskildri nýrri 5. deild. Hann á 37 leiki að baki í 2. deild og hefur skorað 6 mörk í þeim.

Magnús hefur verið lykilmaður í liði Reynis á undanförnum árum en hann spilaði hálft síðasta tímabil með Njarðvík í Lengjudeildinni. Það er afar sterkt hjá Reynismönnum að fá hann fyrir komandi átök.

Magnús er fæddur 1999 og hefur skorað 9 mörk í 41 leik í 2. deildinni. Hann skoraði 5 mörk í 20 leikjum þegar Reynir féll úr 2. deildinni sumarið 2022 og skoraði svo 3 mörk í 8 leikjum til að hjálpa Reynismönnum beint aftur upp síðasta sumar, áður en hann skipti til Njarðvíkur.
Athugasemdir
banner
banner
banner