Þorsteinn Már Ragnarsson í KR (Staðfest)

Þorsteinn Már sem er 22 ára gamall hafði verið fyrirliði Ólafsvíkinga í sumar en var lánaður til Raufoss í Noregi á lokadegi félagskiptagluggans 30. ágúst síðastliðinn.

Hann var ákveðinn í að skipta um lið nú í haust og reyna fyrir sér í Pepsi-deildinni og á endanum valdi hann á milli KR og Stjörnunnar. Nú hefur verið staðfest að hann valdi KR eins og Fótbolti.net greindi frá í gær.

Þorsteinn hefur mikla reynslu þrátt fyrir ungan aldur en hann hefur verið í lykilhlutverki hjá Víkingi Ólafsvík undanfarin ár. Hann byrjaði að leika með meistaraflokki félagsins 2007 og lék það sumar 15 leiki í 1. deild.

Hann á um 90 leiki að baki fyrir Ólafsvíkurliðið en í sumar spilaði hann 18 leiki í 1. deildinni og skoraði sex mörk.

Hann er annar leikmaðurinn sem KR fær til liðs við sig í vetur en áður hafði Haukur Heiðar Hauksson komið frá KA. KR hefur misst Gunnar Örn Jónsson sem fór í Stjörnuna.