,,Mér skylst að veðrið eigi að vera frábært út vikuna og við verðum að njóta þess á meðan við getum. Það styttist óðum í haustlægðirnar," sagði Freyr Alexandersson þjálfari íslenska kvennalandsliðsins sem mætir Dönum á fimmtudaginn í undankeppni HM á Laugardalsvellinum.
,,Leikmennirnir eru í fínu standi. Það eru fimm leikmenn sem spila erlendis og þær voru að spila á laugardaginn flestar. Svolítið þreyttar í gær og á sunnudaginn en það var vitað mál," sagði Freyr en óvenju fáir leikmenn eru í landsliðshópnum að þessu sinni sem leika erlendis.
,,Ég hef ekki kafað í það síðan hvenær það voru svona fáir leikmenn að spila úti en það er líklega komin 7-8 ár síðan. Það er þróunin og hún getur verið bæði jákvæð og neikvæð. Ég fæ ekkert útúr því að líta á það neikvæðum augum. Ég sé að stelpurnar sem eru að spila hérna heima eru í hörku standi og með mikið sjálfstraust og við lítum vel út," sagði Freyr.
Síðustu ár hefur af og til dottið inn skemmtilegar auglýsingar með íslenska landsliðinu, þá aðallega ljósmyndir sem vakið hafa athygli.
,,Það verður engin herferð. Við óskum eftir því að fólk komi á völlinn og taki þátt í leiknum með okkur. Við erum að fara fá frábæran leik, Danir eru með mjög skemmtilegt fótboltalið og við einnig. Þjóðin getur komið og tekið þátt í leiknum með okkur," sagði Freyr en leikurinn hefst klukkan 19:30 og vonandi að sem flestir láti sjá sig á vellinum og hvetji stelpurnar áfram í baráttunni um laust sæti á HM.
Viðtalið í heild sinni er hægt að sjá í sjónvarpinu hér að ofan.
Athugasemdir