„Það eru mikið af tilfinningum," sagði Guðmundur Þórarinsson eftir 4-1 sigur Íslands gegn Ísrael í kvöld.
„Ég held að þetta hafi verið skemmtilegur leikur á að horfa. Þetta víti sem þeir fá í stöðunni 2-1 var stórt móment, frábært að þeir skyldu klúðra því. Við sköpuðum helling af færum. Það er geðveikt að vera kominn í úrslit um sæti á EM og þar getur auðvitað allt gerst."
Lestu um leikinn: Ísrael 1 - 4 Ísland
Það var fámennt en góðmennt í stúkunni í kvöld en Gummi Tóta er Selfyssingur og fékk mikinn stuðning frá sínum mönnum.
„Það er geggjað. Ég sá að Bjarki Már (Elísson) var mættur og svo var bróðir minn (Ingólfur Þórarinsson) í stúkunni. Ef við getum fengið fólk á völlinn í Póllandi væri það geggjað því það skiptir máli að hafa tólfta manninn með okkur. Núna er þetta úrslitaleikur um sæti á EM þannig það verður lagt gersamlega allt í sölurnar," sagði Gummi Tóta.
Albert Guðmundsson átti frábæran leik en hann skoraði þrennu.
„Ég veit ekki hvað ég á að segja, hann er geggjaður leikmaður. Það er frábært fyrir okkur að fá hann aftur. Hann er búinn að standa sig frábærlega á Ítaliu, það eru svo mikil gæði í honum, týpískur góður í fótbolta. Það er svo mikilvæg fyrir okkur að hafa svona menn. Við erum með marga sem eru góðir í fótbolta og hann smellpassar inn í þetta. Ég er virkilega glaður fyrir hans hönd," sagði Gummi Tóta.